ഈദ് സന്ദേശം
സയ്യിദ് അബ്ദുറഹ്മാന് അല്ബുഖാരി ഉള്ളാള്
കോഴിക്കോട് : ഇസ്ലാമിലെ ആഘോഷം ആരാധനയാണ്. പരസ്പരം സ്നേഹവും സന്തോഷവും പങ്കുവെച്ചും ഇല്ലാത്തവന് ദാനം നല്കിയും കുടുംബ, അയല്പക്ക സൗഹൃദം കൂടുതല് ദൃഡപ്പെടുത്തിയുമാണ് ചെറിയ പെരുന്നാള് ആഘോഷിക്കേണ്ടതന്ന് സമസ്ത കേരള ജംഇയ്യത്തുല് ഉലമാ പ്രസിഡന്റ് സയ്യിദ് അബ്ദുറഹ്മാന് അല്ബുഖാരി ഉള്ളാള് ഈദ് സന്ദേശത്തില് പറഞ്ഞു. പകല് മുഴുവനും നോമ്പനുഷ്ടിച്ചും രാത്രി നിസ്കരിച്ചും ഖുര്ആന് പാരായണം നടത്തിയും വിശുദ്ധ റമളാനിനെ ധന്യമാക്കിയ വിശ്വാസികള്ക്ക് അല്ലാഹു അനുഗ്രഹിച്ചു നല്കിയ ആഘോഷമാണ് ഈദുല്ഫിത്വര്. റമളാനില് നേടിയെടുത്ത ആത്മീയ വിശുദ്ധി ആഘോഷത്തിന്റെ പേരില് കളഞ്ഞ് കുളിക്കുന്നത് വിശ്വാസികള്ക്ക് യോജിച്ചതല്ല. വ്യക്തി ജീവിതത്തെ പരിശുദ്ധമാക്കുന്നതിന് കളമൊരുക്കിയ റമളാന് വിടപറഞ്ഞെങ്കിലും നന്മകള് നിറഞ്ഞ പെരുന്നാളോഘോഷത്തിലൂടെ നല്ല ജീവിതത്തിന് കൂടുതള് അവസരമുണ്ടാകട്ടെ എന്നാശംസിക്കുന്നു.
കാന്തപുരം എ. പി അബൂബക്കര് മുസ്ലിയാര്
കോഴിക്കോട് : വ്രതത്തിലൂടെ നേടിയെടുത്ത ആത്മീയ ഊര്ജം സഹജീവികളോടും കൂടി പങ്കുവെക്കുമ്പോള് മാത്രമേ റമളാന് ഫലപ്രാപ്ര്ത്തിയിലെത്തുകയുള്ളൂവെന്ന് അഖിലേന്ത്യാ സുന്നി ജംഇയ്യത്തുല് ഉലമാ ജനറല് സെക്രട്ടിറി കാന്തപുരം എ. പി അബൂബക്കര് മുസ്ലിയാര് ഈദ് സന്ദേശത്തില് പറഞ്ഞു. വിശ്വാസിള്ക്ക് ആത്മീയ അച്ചടക്കം പോലെ പ്രധാനമാണ് ശാരീരികവും സാമ്പത്തികവുമായ അച്ചടക്കം. നിലനില്പ്പിന് അത്യന്താപേക്ഷിതമായത് മാത്രം എടുക്കുകയും മറ്റുള്ളതെല്ലാം ഉപേക്ഷിക്കുകയും ചെയ്യുക എന്ന അച്ചടക്കമാണ് റമളാന് വിശ്വാസികളെ പഠിപ്പിച്ചത.് വിഭവങ്ങളുടെ ദൗര്ലഭ്യതയും വിലക്കയറ്റവും രൂക്ഷമായികൊണ്ടിരിക്കുന്ന ഈ കാലത്ത് ഇസ്ലാം മുന്നോട്ട് വെക്കുന്ന മിതത്ത്വ ശീലത്തിന് വലിയ പ്രാധാന്യം ഉണ്ട്. ഉപഭോഗം അടിസ്ഥാന മാക്കിയുളള സാമ്പത്തിക ക്രമങ്ങള് തകരുന്നതിന്റെയും നിലനില്പ്പിന്നായി പാട്പെടുന്നതിന്റെയും വാര്ത്തകള് നാം കേട്ടുകൊണ്ടിരിക്കുകയാണ.് ഇതിന്ന് എതിരെ തിരസ്കാരത്തിന്റെ സമ്പത് ശാസ്ത്രം ഉയര്ത്തികൊണ്ട് വരാന് വിശ്വാസികള് ഉല്സാഹിക്കണം.
സഹജീവികളുടെ വിശപ്പും വേദനകളും മനസിലാക്കാന് ഓരോ വിശ്വാസിയെയും പാകപ്പെടുത്തുക വഴി അന്യരുടെ വിശപ്പും വേദനകളും മാറ്റാന് ഒരോ വിശ്വാസിയെയും ഉത്തരവാദപ്പെടുത്തുകയും കൂടിയാണ് റമളാന് ചെയ്തത്.
മുപ്പത് ദിവസത്തെ വ്രതം പൂര്ണമാകണമെങ്കില് ദുര്ബലരെ ഭക്ഷിപ്പിക്കുക കൂടിവേണം ഈ പാഠമാണ് ഫിത്വറ് സകാത്ത് നല്കുന്നത്. ഇസ്ലാം പുലര്ത്തുന്ന നീതി ബോധത്തെയും ലോക വീക്ഷണത്തെയുമാണ് അത് പ്രതീകവല്കരിക്കുന്നത് അല്ലാഹുവിനോടുള്ള പ്രാര്ത്ഥനകളെ മറ്റു മനുഷ്യര്ക്ക്ക്കൂടി ഉപകാരപ്പെടാന് പാകത്തില് പരിവര്ത്തിച്ച് എടുക്കാനാണ് ഇത് വിശ്വാസികളോട് ആഹ്വാനം ചെയ്യുന്നത്.
ഈ പാഠം ഉള്ക്കൊണ്ട് ഈദ് ആഘോഷിക്കാന് സമൂഹം തയ്യാറാവണമെന്നും അദ്ദേഹം പറഞ്ഞു.
പൊന്മള അബ്ദുല് ഖാദിര് മുസ്ലിയാര്
കോഴിക്കോട് : കാലുഷ്യങ്ങളും മന:സംഘര്ഷങ്ങളും അധികരിച്ച ലോകത്ത് സ്നേഹത്തിന്റെയും സമാധാനത്തിന്റെയും ജീവിത സാഹചര്യം തീര്ത്ത വിശുദ്ധിയുടെ നാളുകള് താല്ക്കാലികമായി വിടവാങ്ങി. വിശുദ്ധ റമളാനും വ്രതവും നല്കിയ ആത്മീയ പരിചരണത്തിന്റെയും പാകപ്പെടലിന്റെയും പരിരക്ഷക്ക് മുന്തിയ പരിഗണന നല്കി ശേഷകാലത്തും ജീവിക്കാന് എല്ലാവരും ശ്രമിക്കണമെന്ന് എസ്.വൈ.എസ് സംസ്ഥാന പ്രസിഡണ്ട് പൊന്മള അബ്ദുല് ഖാദിര് മുസ്ലിയാര് ഈദ് സന്ദേശത്തില് പറഞ്ഞു. സാന്ത്വനത്തിന്റെ സ്നേഹ സ്പര്ശങ്ങള് കൊണ്ട് അര്ഹരായവര്ക്ക് സമ്മാനിക്കുന്നതിന് റമളാനിലെ റിലീഫ്, ദാന ധര്മ്മങ്ങള് പ്രചോദനമായിരിക്കണം. സുകൃതങ്ങളുടെ വെള്ളിത്തേരിലേറി നന്മകളനുഷ്ടിച്ചും ആചരിച്ചും പെരുന്നാളിന്റെ പൊന് പുലരിയിലെത്തിയ വിശ്വാസി ലോകത്തിനും സഹൃദയ സമൂഹത്തിനും സ്നേഹത്തില് ചാലിച്ച ഒരായിരം പെരുന്നാള് ആശംസകള്.
പേരോട് അബ്ദുറഹ്മാന് സഖാഫി
കോഴിക്കോട് : വിശുദ്ധ റമളാന് പകര്ന്നുതന്ന ആത്മീയോത്കര്ഷവും മാനുഷിക മൂല്യങ്ങളും കാത്തുസൂക്ഷിക്കാനും സമൂഹത്തിനു പകര്ന്നു നല്കാനും പ്രതിജ്ഞാബദ്ധരാവണമെന്ന് എസ്.വൈ.എസ് സംസ്ഥാന ജനറല് സെക്രട്ടറി പേരോട് അബ്ദുറഹ്മാന് സഖാഫി ഈദ് സന്ദേശത്തില് ആഹ്വാനം ചെയ്തു.
സത്യം, നീതി, സഹജീവി സ്നേഹം, സഹിഷ്ണുത, സമത്വം, ലാളിത്യം തുടങ്ങിയ മാനുഷിക മൂല്യങ്ങള് പകര്ത്തുക വഴി ജീവിതം ചിട്ടപ്പെടുത്താനുള്ള പരിശീലനക്കളരിയായിരുന്നു പിന്നിട്ട ഒരു മാസക്കാലം. വിശുദ്ധ രാപ്പകലുകളുടെ പവിത്രതയെ കളങ്കപ്പെടുത്തുന്ന തെറ്റായ പ്രവണതകള് ഓരോ വര്ഷവും കുറഞ്ഞുവരുന്നുവെന്നത് ചാരിതാര്ഥ്യജനകമാണ്. വ്രതമാസത്തെ കര്മ്മങ്ങളാല് ധന്യമാക്കിയവര് ധന്യരാണ്. മുഴുവന് സ്നേഹജനങ്ങള്ക്കും ഈദാശംസകള് നേര്ന്നു.
